FRUM spældi á G! á fyrsta sinni í 2018, og vit eru spent at bjóða henni aftur á pall á G! 2022. Higartil hevur føroyska listafólkið hugtikið okkum vid fleiri stakløgum, sum hava veri spæld í kringvarpinum, í Netflix sjónvarpsrøðum, og seinastu árini hevur hon spælt á fleiri aljtóða showcase festivalum.

Listin hjá FRUM er fødd av náttúrliga forvitni hennara, og av spurningum hennara til og um fatanina av rúminum kring hana. Við at grundarleggja skapanina á lutir frá gomlum siðum og nýmótans lívi, leiðir FRUM áskoðaran inn í ein skiftandi alheim, har spurningar um tilveru verða settir, og ikki neyðturviliga svaraðir. FRUM skapar tónleik, ið ikki einans er fangandi, men sum eisini leiðir lurtaran á eina ljóðferð við sterkum visuellum myndaheimi.