Telemama er ein nýggjur indie rokk bólkur úr Tórshavn. Teir fýra ungu mennirnir, sum manna bólkin, hava fingið íblástur frá alternativa/indie rokk rákinum, og nú hava teir sjálvir luttikið í rákinum við eini blanding av nútímans indie rokki og bedroom poppi.
Telemama luttóku í tónleikakappingini Sement í 2021 við trimum av løgum sínum, og har fingu teir veruliga blóð á tonnina. Nú skulu teir spæla á G! festivalinum, har teir ætla at vísa fram fleiri løg, sum teir í løtuni eru í gongd við at spæla inn, ið síðani koma á eina EP, sum kemur út seinni í ár.

Sangirnir hjá Telemama snúgva seg stutt og greitt um at vera ungur í Føroyum og taka serligt støði í kærleika, girnd, at hugna sær og um náttarlívið í høvuðstaðnum. Eisini nerta tekstirnir við álvarsligari evni so sum tunglyndi, samleikakreppu og eksistensialismu, ið eisini spæla ein part í lívunum hjá ungum føroyingum. Sorgblíðu orðini sveima á nostalgiskum melodium á gittarunum, meðan akkordirnar eru merktar jazzi og summarsligum funk-rokki, ið fær lurtaran upp at dansa.