Lena Anderssen er ein av okkara fólkakæru songkvinnum, sum hevur verið fulltíðarvirkin í tvey áratíggju á tónleikapallinum, bæði í Føroyum og uttanlands. Við fimm útgávum í rygginum og tí sættu – State of the Land – ávegis fara Lena og hennara bólkur at framføra bæði eldri løg og nýggjar sangir á Spæliplássinum fríggjakvøldið 16. juli.
Seinasta árið hava føroyingar hoyrt nógv til eitt nú “Aimee”, sum kom út í 2020, og í mei í ár fekk triðja staklagið “The Airport” veingir og hevur verið spælt á bretska BBC fleiri ferðir og var millum annað “Artist of the Week” á BBC í Norðurírlandi.
Lena skal seinni í ár á konsertferð uttanlands. G! verður fyrsta høvi at hoyra føroysku songkvinnun framføra spildurnýtt tilfar live við bólki.