Høgni Lisberg og bólkur hansara eru, sum so nógv onnur, farnir í gongd aftur at framføra og spæligleðin er stór. 

Høgni vann her fyri ein FMA sum ársins framleiðari, í felag við James Thomas, fyri útgávuna Within a Man, sum kom út í 2020. 

Av hesi útgávuni hava serliga løgini Simple Man, On Your Side og Waiting for You verið at hoyrt í útvarpinum.

Orsakað av korona, hevur tónleikurin næstan ikki verið framførdur alment, og er tí enn spillfeskur. 

Høgni hevur nógvar túsund lurtarar á Spotify, og tónleikurin hann hevur givið út hevur verið brúktur um allan heim í øllum frá NBA telduspølum og Netflix røðum til Carhartt klæðir og Subaru bilar. 

Við Høgna á palli vera Jan Rúni Poulsen á trummum og slagverki, og Knút Háberg Eysturstein á tangentum.