Týska GRETA er fødd í 90'unum, men hevur síðan tannárini havt ein kærleika til alt, sum er frá 80'unum, ikki minst tónleikin! Mann hoyrir íblásturin frá 80'unum aftur í droymandi lagføgru poppløgunum, gomlu synth-unum, og 80'arasligu trummunum, sum fær teg at leingjast eftir farnari tíð.
GRETA er ikki púra fremmand við Føroyar - Fyrsta EP'in við heitinum Wild and Young bleiv produserað í Føroyum saman við Teiti - GRETA og Teitur møttust á danska Tónlistaháskúlanum fyri nøkrum árum síðani, har Teitur legði merki til skapandi gávurnar hjá GRETU. Hon hevur síðani útgivið Ardent Spring, sum inniheldur 12 løtt og lívlig poppløg, ið vóru væl móttikin í Danmark. Fleiri av hennara løgum hava verið at hoyra á DR P3, og í tónleikamiðlinum GAFFA fekk hon heilar seks stjørnur av seks, tey skrivaðu í yvirskriftini í ummælinum "Ein sterk fyrsta útgáva, sum rúnarbindur frá byrjan til enda".
Vit gleða okkum at bjóða týsku GRETU til Føroya á G!