Tað er hart at vera til - Orðini eigur Helena Heinesen Brimheim, sum er "sangari-sangskrivari" og spælir undir navninum Brimheim. Orðini passa væl til tónleikin hjá henni har tekstirnir geva eitt djúptøkið innlit í lívið og hugsanir um tilverukreppur, kærleika, og angist.
Røddin er kenslunomin, og tónleikurin er rokkuttur, ráur, dapur, men brýtur til tíðir út úr álvarseminum við einum løttum og fangandi niðurlagi.
Brimheim kann lýsast, sum eitt ástarbarn millum PJ Harvey og Caroline Polachek, tú merkir í tónleikinum at Helena er brimbrýnd av lívinum, og reinlyndu tekstirnar kennast ektaðir, og rakað beint í eyðmjúka hornið í hjartanum.

Vit gleða okkum at uppliva Brimheim á G! fyri fyrstu ferð!