Orka er bólkurin hjá Jens L. Thomsen, ið byrjaði sum ein skúlaverkætlan fyri meira enn 10 árum síðani. Upprunaverkætlanin snúði seg um at gera tónleik burtur úr tí tú hevði við hondina. Jens fór við nøkrum av sínum vinum í fjósið hjá pápanum og har gjørdu teir ljóðføri og tónleik á staðnum burturúr tí, sum teir funnu í fjósinum. Úrslitið var slóðbrótandi útgávan Livandi Oyða. Men Orka steðgaði ikki har. Jens hevur verið í einari støðugari tónlistarligari leitan og broyting. Tónleikurin er við tíðini vorðin meira og meira elektroniskur og samstundis kanska einfaldari og ráari, tó uttan at missa tann serliga rytmikkin og musikalitetin, sum eyðkennir alt, ið Jens fæst við. Orka hevur tvær ferðir verið í uppskotið til Tónlistarvirðisløn Norðurlandaráðsins.