SUSPEKT hava verið millum fremstu hip hop bólkarnar í Danmark heilt síðani nítiárini. Teir eru kendir fyri eina serliga myrka útgávu av hip hop, ónærisligar tekstir og garrvillar live framførslur. Teimum dámar tað víðgongda og ógvusliga. Huglagið og visuella úttrykkið minnir tíðum um tað, vit kenna frá tungmálmi og ræðufilmum. Summi kalla hesa greinina av hip hop fyri ‘horrorcore’.

SUSPEKT hava síðani teir byrjaðu heystað ein hóp av ummælararósi, selt metnógvar fløgur, og fingið eitt ótal av tilnevningum og heiðuslønum. Herímillum tilnevning til Grammy Award fyri samstarvið við Kendrick Lamar. Í 2015 gjørdi DR dokumentarrøðina ‘Da Danmark Blev Suspekt’, sum lá á listanum yvir 5 tær mest sæddu sendingarnar hjá DR tað árið. Suspekt verða mangan umrøddir sum besti livebólkur í Danmark og vunnu m.a. Danish Music Awards fyri “besti livebólkur” umframt 5 aðrar prísir í 2015. Eisini vunnu teir áhoyraraprísin á P3 Gull virðislønunum hjá DR sama ár.

SUSPEKT koma sera væl mannaðir á G! við ikki færri enn 12 fólkum á palli.