Atgongumerkjasölan til einstöku dagarnar letur upp
Tey óhepnu og tey selektivu sleppa eisini á G! Festival, tí nú verða dagsatgongumerkini til keyps
Summarið er í eygsjón og tað er longu kjokkfult í góðum, forvitnisligum G! vitaminum. 26 nøvn eru komin á skránna higartil og festivalfólkið hevur eina rúgvu av stórum upplivingum fyri framman: Víðagitni Kris Kristofferson, dukandu Suspekt, heimskendu hittmakararnir Alphaville og feskasta stjørnan á popphiminum MØ. Hesi eru bara nøkur millum mongu nøvnini, sum savnast í Syðrugøtu í næsta mánað.
Men eitt heilt vikuskifti á Gøtusandi við livandi tónleiki frá heimsstjørnum er ikki øllum unt. Tað finnast tey óhepnu, sum skulu á náttarvakt hóskvøldið og tey ambivalentu, sum skulu í brúdleyp leygarkvøldið. Tað finnast eisini tey selektivu, sum bara vilja hoyra sín yndisbólk.
Tey hava møguleikan at sníkja seg ein túr á G! Festival, tí nú verða atgongumerkini til einstøku festivaldagarnar til keyps. Men tey eru avmarkað í nøgd, so sitið klár! Sølan opnar í morgin 7. juni klokkan 8:00.
Tað ræður um at liggja framvið, og vit gera tað lætt hjá tær at kunna teg um, hvønn dag tín yndisbólkur fer á pall. Dagsskráirnar verða kunngjørdar á middegi her á Facebooksíðuni og á heimasíðuni hjá G!
Fylg við - tú mást fara!