Fyrireikingar til G! 2020 eru veruliga farnar í gongd og hevur festivalurin fleiri tíðindi at bera í nærmastu framtíð.
 
Fyrsti tíðindabitin í røðini er setanin av nýggja tónleikastjóranum Michael A. C. Johannesen. Michael hevur verið forstjóri í street-wear handlinum Útilív seinastu árini, er tónleikaframleiðari og er eisini sera virkin í DJ umhvørvinum.
 
Michael er ikki ókendur í G! høpi. Seinastu tveir festivalarnar hevur hann staðið fyri Grundini. Nú far hann fleiri pallar at umsita og arbeiða við. Michael sigur soleiðis um nýggja møguleikan: “Eg gleði meg til avbjóðingina, og at halda fram við tí góða arbeiðinum, sum Fred hevur gjørt seinastu árini. G! er nakað heilt serligt, og tað fer tað altíð at vera, og eg síggi fram til at avdúka tey fyrstu nøvnini til G! 2020 og kann longu nú siga, at fólk kunnu gleða seg.”
 
Nýggi tónleikastjórin kemur at virka í tøttum samstarvi við Fróða Tórálvsson Stenberg, ið hevur røkt altjóða sambond hjá festivalinum, og sum nú eisini samskipar PR, marknaðarføring og logistik hjá festivalinum. Umframt Michael og Fróða, eru Kristfríð Tyril, høvuðssamskipari og Sigvør Laksá, stjóri, partur av fasta toyminum hjá G! festivalinum.

Meira verður at frætta frá G! í næstum.