Marius á sandinum
Um skamma stund fer Marius Ziska at framføra á Sandinum. Marius hevur júst latið fløguútgávuna Portur úr hondum, sum sambært Marius er »ein útgáva, sum snýr seg um, at vit menniskju liva í tveimum ymiskum veruleikum – tí innara og uttara veruleikanum, og at sansirnir eru portrini millum hesar báðar veruleikar«.
Marius er vorðin væl og virðiliga kendur í Føroyum seinastu árini og hevur eisini framført nógv uttanfyri landoddarnar við fyrru útgávuni Heim/Home. Talan var um eina inniliga og hjartanemandi útgávu, sum sannførdi bæði føroyskar og útlendskar ummælarar og lurtarar.
Nýggja útgávan er á føroyskum og Hans Jacob Kollslíð hevur yrkt orðini. Hetta verður væntandi ein sansalig og poetisk framførsla, sum heldur áfram beint har, sum Heim/Home slepti.