Tann stóra løtan í kvøld!
Sangløtan: Í kvøld klokkan 22.10 fara vit saman við Elini, Stanley og Terja at syngja, skála og klemmast.
Fyri nógvar av gestunum á G! er ein heilt serlig løta leygarkvøldið á festivalinum. Vit hugsa sjálvandi serliga um stóru Sangløtuna, tá fólk leita sær oman á sandin at syngja, flenna og klemma. Henda løta verður í kvøld klokkan 22:10 á sandinum.
Eitt serligt huglag hoyrir til Sangløtuna - ein sterk tjóðskaparkensla og stoltleiki, sum kann samanberast við tí, sum eisini hoyrir til midnáttarsangin á ólavsøku. Tað, sum tó sermerkir Sangløtuna á G!, er, at her verður eisini framført á ljóðførum, og at tey, sum syngja fyri, sum oftast sjálvi hava skrivað sangirnar, greiðir Elin Brimheim Heinesen frá. Elin er ein av teimum, sum koma at syngja fyri á Sangløtuni í kvøld.
- Tað at syngja saman er ein inngrógvin partur av okkara mentan, og Sangløtan er altíð ein fantastisk uppliving – óansæð um tað er á pallinum ella í fjøldini, leggur Elin afturat.
Tónleikararnir, sum koma at framføra føroyskar perlur á Sangløtuni í kvøld, eru Elin Brimheim Heinesen, Hjalti Joensen, James Olsen, Jóan Jakku Guttesen, Kaj Johannesen, Kim Hansen, Sámal Ravnsfjall, Steintór Rasmussen og Terji Rasmussen.
Tekstirnir til Sangløtuna eru at finna á gfestival.fo/sang.
Síggjast á sandinum kl. 22:10!
