Tá ið tú umaftur og umaftur hoyrir um eitt tónleikanavn, frá heilt ymiskum fólkum og alla möguliga staðni frá, tá er sum oftast okkurt um prátið. Soleiðis er við danska bólkinum Smag På Dig Selv, sum vit við hesum leggja afturat tónleikaskránni í ár.

Talan er um ein tríbólk, ið er samansettur av einum trummuleikara og tveimum saxofonleikarum. Fólk práta um teir allastaðni í norðanlondum, og orsökin er stutt og greitt, at teir eru ein so hamrandi feitur bólkur á palli. Orkan er ögilig, næstan punkkend, meðan tónleikurin er teknokendur og ávirkaður av djassi, poppi, hipp hoppi, afroslátti og 90'ara evrodansi.

Gleð teg til at hoyra eitt av mest peppaðu donsku növnunum á palli, tá ið teir koma at framföra á G! 17.-19. juli.

Fylgið annars við í morgin, tá ið vit fara at kunngera fyrru helvtina av Júxn skránni, sum er skráin við bókmentum og öðrum spennandi.