G! Maturin: Gott úrval og høg góðska
Tá ein hugsar festivalar, so hugsar mann allarhelst um tónleikin, huglagið og ballið - men í ár fara gestirnir á G! óivað eisini at hugsa um matin.
Á G! 2019 eru heili 13+ matarstøð, har gestirnir kunnu keypa sær ein bita. Í ár ber til at fáa alt frá ramen til fish&chips.
Men tað er ikki bara ein og hvør matur, ið verður seldur. Fyriskiparirnir á G! leggja stóran dent á góðsku og seta sera høg krøv til hvørt einasta matarstað.
Kristfríð Tyril sigur m.a: “Tað skal vera kvalitetur, tað má gjarna vera vistfrøðiligt. T.d. við djúsi, so skal tað vera gott og nýgjørt. Úrvalið má gjarna vera breitt, og fevna um vegetarar. Festivalmatur skal ikki bara vera pylsur og vánaligt kjøt.”
Eitt dømi um hetta er matvognurin Brioche, ið hava tikið teirra matvogn við norð til Syðrugøtu. Vognurin hevur nú í eina tíð koyrt runt og selt burgarar kring landið, og er vorðin bæði kendur og væl dámdur.
Kristfríð Tyril heldur at hetta er ein gott ískoyti til matarumhvørvið á G! “Brioche nýta kjøt frá oksa, ið hevur gingið leysur og vørur av ógvuliga góðsku.”
Ein nýggj vøra í ár er alkoholfrí øl. Orsøkin til hetta er, at har eru fleiri, ið ynskja at drekka øl, uttan at blíva ávirkaði ella full. Øl er fyri fleiri ein kjarna av tí at vera á festival, men tað nýtist ikki at vera knýtt at rúsi.
Tað er tískil okkurt til hvønn bæði at eta og drekka á G! og við hetta lag man úrvalið bert fara at breiðkast og betrast.
Mynd: Alessio Mesiano