At savnast um at vera øðrvísi er onkursvegna ímyndin av G! Men tá vit hugsavna okkum so nógv um at tekkjast øðrum, steðgar ymiskleikin at samljóða, og umringað gerast vit mest einsamøll.

Leikurin RINGrás snýr seg um seks ung, sum hittast til tónleikavenjing. Ein klaverleikari, ein gittarleikari, ein forsangari, tveir kórsangarar og ein ljóðmaður. Seks ymiskir persónar við seks ymiskum persónsmenskum, sum skulu venja at syngja í samljóði.

Men umringað av øðrum snýkir veruleikin seg fram. Hví síggja hini ikki, hvat tey veruliga ynskja? Hví er tað so einsligt at vera partur av felagsskapinum?

Gjøgnum tónleik og misljóð rannsaka teir seks leikararnir týdningin og avleiðingarnar av at sleppa at framføra sítt egna ljóð, men samstundis at skula laga seg eftir bólkinum.

RINGrás/orBIT framførir í Fjósinum í kvøld kl. 19.00.