Ein rúgva av fólki eru komin saman í góðveðrinum framman fyri stóra skíggjan í Syðrugøtu, og gestir streyma framvegis inn á økið. Onglendingar eru á odda 1-0 í løtuni og hýrurin er sera góður. Fyrri hálvleikur er júst nú av, og fólk hava høvi til at keypa sær drekkivørur og mat úr mongu básunum.

Rag’n’Bone Man kom til Syðrugøtu fyri tveimum tímum síðan og situr allarhelst og fylgir við í dystinum. Uttan so at dysturin fer inn í yvirtíð og brotssparkakapping, fer Rag’n’Bone Man á stóra pallin á Sandinum um hálvanannan tíma, beint tá ið dysturin er av.