G! andin hongur yvir Syðrugøtu, og vit hava framvegis veðrið við okkum. Umframt tónleikin hava ponyríðing, svimjing og heitir pottar á Sandinum sett sín dám á hendan fríggjadagin higartil. Fyri eini løtu síðan kom ein riðil av veitsluhýrdum festivalgestum syngjandi av tjaldingarøkium til Fjósið, tá ársins G! parada var á skránni og veitsluhýrurin heldur fram alt kvøldið, tí skráin er full av føroyskum og útlendskum góðskutónleiki.

Um eina løtu spælir føroyski Silvurdrongur á Spæliplássinum, og klokkan 20.20 verður fyrsta konsert á Sandinum í kvøld, tá ensku Desert Mountain Tribe trína á pall við sínum sinnisrúmkandi rokktónleiki. Klokkan 21.30 kanst tú uppliva heimstónleik frá afrikanska Bombino á Spæliplássinum, og klokkan 22.45 sleppa donsku Suspekt at spæla sín myrka og djúpa horrorcore tónleik á Sandinum.

Longri út á náttina sleppa vit at uppliva tríggjar føroyskar tónleikabólkar, sum á hvør sín hátt skara framúr. Klokkan 00.20, spælir lokali Benjamin Petersen undir navninum Son of Fortune á Spæliplássinum, klokkan 01.20 spælir ORKA nýggjan og skraddaraseymaðan tónleik á Sandinum og klokkan 02.20 rokka 200 á Spæliplássinum. Yeah baby!

Umframt alt hetta, er Fjósið proppað við góðum nøvnum alt kvøldið. Millum nøvnini á skránni í Fjósinum eru Uni Debess (23.00), Stanley Samuelsen (00.00) og Damudomi DJs (02.00).

Tað er fríggjakvøld, tað er G! og tú mást fara!