Allan fríggjadagin verður Fjósið karmur um góðan stemning og glaðan spælimannstónleik. Tí tá taka Summartónar yvir og fylla hølini við fólkatónleiki. Frá kl. 18 - 01 verður pallurin á tremur við tónleiki frá eitt nú Lyon, Kata, Stanley Samuelsen og Spælimonnunum. 

Endað verður við fimm kvinnuligum diskarum frá Damudomi, sum halda lív í fjósinum til kvøldið er liðugt kl. 04.

Men nú klokkan 16:30 verður høvi at føla eftir í búkinum, tá Gut // Productions fara undir at prika til okkara dulvit og arga okkara samfelagsfatan við einum alternativum bíbliulesnaði, sum vendir allar okkara rótfastu meiningar á ranguna eina løtu: hvussu hevði heimurin sæð út, um øll kynini í Bíbliuni vórðu býtt um? Hvussu hevði tað ávirkað okkara samleika og heimsfatan, um kvinnurnar áttu jørð, fóru í kríggj og samskiftu beinleiðis við Gud, sum var ein Gudinna? Ella um menninir føddu børnini og stóða aftan fyri sterku kvinnurnar?

Bíbliu-fordómarnir skulu hvørva, og eftir skulu standa nakrar vakrar søgur. Framførslurnar hjá Gut // Productions eru í Fjósinum nú kl. 16.30 og leygardagin kl. 17.00.