Barna G! 2017
Aftur í ár verða stórar upplivingar til tey smáu á G! Her fært tú ein stuttan samandrátt um Barna G! 2017.
Angela Petersen samskipar í ár Barna G!, ið verður leygardagin frá klokkan 12.00 til 16.00. Aftur í ár fara vit at stuttleika okkum við nógvum sangi, undirhaldi, skemti og søgu, har børnini sleppa at verða ein partur av søguni. Framførslur verða á pallinum, ponyríðing, og sjálvandi fara vit at hugna okkum á sandinum, har nógv fólk eru at taka ímóti børnunum. Vit fara at spæla ymisk spøl, millum annað fara vit at gera eina sandkapping fyri familjur.
Ein hevur ikki verið á G! uttan at fáa sand millum bibburnar :-)
Børn undir 12 ár sleppa ókeypis inn, saman við vaksnum, sum hava atgongumerki. Ponyríðingin verður fríggjadagin frá 16.00-19.00 og leygardagin frá 14.00-18.00.
Á SPÆLIPLÁSSINUM
kl. 12.30: The Kii to Cosplay fara at framføra SANGIR ÚR FROZEN.
kl. 13.00: FAMILJUSHOW við Angelu og Hannibal. Klovnurin Hannibal og Angela skemta.
kl. 14.00: SANGLØTA við Guðruni Sólju Jacobsen, har børnini kunnu syngja við.
kl. 15.00: Jensina Olsen undirheldur við SKEMTI OG SANGI.
Í FJÓSINUM
Klokkan 15. 30 verður CAFÉSJÓNLEIKUR við Vivian Sjóðklett. Vivian fortelur ævintýr og brúkar børnini sum leikarar. Hetta verður fínt høvi hjá øllum børnum, sum elska at royna seg á palli.
Á SANDINUM
Frá kl. 12.00-16.00, verður SANDKAPPING fyri familjur, andlitsmáling og børnini kunnu skapa sítt egna listaverk úr goggum og øðrum lutum, sum tey finna á sandinum. Eisini verða spøl, spakar, spannir og ymiskt annað. Nógv fólk eru á sandinum, sum gleða seg til at hugna sær saman við børnunum.
Vit síggjast á Barna G!