Møt friska lotinum á tunga og myrka føroyska tónleikapallinum! TeleMama luttók í árligu tónleikakappingini, Sement, í 2021.Endamálið var at vísa føroyska tónleikapallinum lívligan Indie Rokk.

Við íblástri frá heimskendum bólkum so sum Arctic Monkeys og The Strokes og nýggjari tónleikarum so sum Her’s, Mac DeMarco og Boy Pablo, handla tektstirnir um afturvendandi evni so sum kærleika, girnd, at stuttleika sær og um býtúrar í høvuðstaðnum, eins og teir handla um álvarsligari evni so sum tunglyndi og samleikakreppu. Høvuðsendamálið er týdningurin at gera tónleik, ið fólk kunnu kenna seg aftur í, men ongin hevur gjørt fyrr.

Í januar í 2022 góvu teir fyrsta staklag teirra út. Lagið, ið ber heiti Identity, er fyrsta lagið á einari EP, ið eftir ætlan kemur út í mai. EP’in, ið ber sama heitið, sum fyrsta staklagið ger, hevur við sær vónina um eitt vanligt summar við stuttleika og gaman eftir eina heimsfarsótt, ið hevur hildið á alt ov leingi. TeleMama vóna at sleppa at spæla nógvar konsertir, meðan teir gera enn meira tónleik og við tí seta sítt preið á føroyska Indie Rokk/Indie Pop pallin og týdningin, hann hevur í einum landi, har illveður og myrkur herjar.